CODCAR-0726
CODCAR-0726
| Grupo | GEDHYTAS |
|---|
| Identificador | CODCAR-0726 |
|---|
| Tipología | Textos legislativos |
|---|
| Archivo | Archivo de la Catedral de Toledo |
|---|
| Referencia | A.3.A.1.11a |
|---|
| Resumen | Fernando IV concede al arzobispo de Toledo, mientras este viva, los maravedís que cien moros de la aljama de Alcalá le han de entregar. |
|---|
| Fecha | 1305 marzo 18 |
|---|
| Lugar | Alcalá de Henares |
|---|
| Provincia | Madrid |
|---|
| País | España |
|---|
| Scriptor | Joán Martínez |
|---|
Opciones de visualización
Texto: - Mostrar:
Javascript seems to be turned off, or there was a communication error. Turn on Javascript for more display options.
Sepan quantos esta carta vieren Como yo Don fferrando por la gracia de dios Rey de Castiella de Toledo de leon
de Galizia de Seuilla de Cordoua de Murçia de iahen del Algarbe & ssennor de Molina Por muchos sseruiçios &
bonos queuos Don Gonçalo Arçobispo de Toledo primado delas espannas & chançeller de Castiella me ffiziestes & me ffazedes
Et por ques Razon & derecho quelos que bien ssiruen ayan porende bon galardon Et yo catando aesto Por uos
ffazer bien & merçed. Tengo por bien deuos dar que ayades para en todos uuestros dias; todos los moravedis que çient
Moros del Aljama delos Moros de Alcala me ouieren adar assi desu pecho quemean adar de cada dia como de
sseruiçio o de sseruiçios o de ayuda o de pedido o de enprestido o de otro qual quier pecho que ayan adar enqual quier manera. Et mando
a estos çient Moros pecheros del Aljama deste lugar ssobredicho que rrecudan Auos el Arçobispo oaquien uos mandaredes
con todos estos moravedis como sobredicho es. Et non a otro njnguno por ninguna mj carta que Muestren que contra esta ssea njn por
otra rrazon ninguna. Et non ffagan ende al. Et yo ssere ende pagado. Sinon Mando al omne quelo ouiere de rrecab
dar por uos queles peyndre & les tome todo quanto queles ffallare. fasta que gelo ffagan assi ffazer. Et mando &
deffiendo ffirme mente que njnguno non ssea ossado de yr njn de passar contra esta merçed que uos yo ffago en
njnguna manera por ninguna rrazon. Sinon qual quier o quales quier quelo ffiziessen pechar mjen en pena mill moravedis
dela moneda nueua. Et demas aellos & alo que oujessen me tornaria porello Et demas mando al Conçeio & alos
alcalles & al Juez & alos Jurados de Alcala que gelo non consientan por njnguna mj carta que Muestren que contra
esto ssea. Et non ffagan ende al por njnguna manera. Sinon aellos & alo que oujessen me tornaria por ello. Et
desto uos mande dar esta carta sseellada con mjo sseello de Plomo Dada en alcala de henares xviij dias
de Março. Era de mill & ccc & xliij annos yo Johan martinez la escreuj por mandado del Rey
johan sanchez fferran perez garcia perez
Descargar XML • Descargar texto
