CODCAR-0643
CODCAR-0643
| Transcriptor | María Nieves Sánchez González de Herrero |
|---|
| Editor 1 | Laura María Rubio Moreno |
|---|
| Editor 2 | Carlos Cabrera Morales |
|---|
| Edición digital | Mireia Peris Vicent |
|---|
| Grupo | GEDHYTAS |
|---|
| Identificador | CODCAR-0643 |
|---|
| Tipología | Textos legislativos |
|---|
| Archivo | Archivo Municipal de Vitoria Pilar Aróstegui |
|---|
| Referencia | 17\013\002 |
|---|
| Resumen | Carta del rey Sancho IV reduciendo a tres días los emplazamientos para quienes maten a alguien en Vitoria. |
|---|
| Fecha | 1294 enero 15 |
|---|
| Lugar | Palencia |
|---|
| Provincia | Palencia |
|---|
| País | España |
|---|
| Scriptor | Pero Sánchez |
|---|
Opciones de visualización
Texto: - Mostrar:
Javascript seems to be turned off, or there was a communication error. Turn on Javascript for more display options.
Don Sancho por la gracia de dios Rey de Castiella de Toledo de Leon de Gallizia de Seuilla
de Cordoua de Murçia de Jahen del Algarbe & ssennor de Moljna. Al Conçejo & alos Alcal
des & alos Jurados de Bitoria Salut & gracia. Viemos uuestra carta que nos enbiastes con fferrand perez
& con johan ssanchez uuestros vezjnos en que dizia que los creyessemos de quanto nos dixiessen de
uuestra parte. Et entre las otras cosas mostraron nos que tenjedes carta del Rey don
Alffonsso nuestro padre que dios perdone en que dize que quien matare omne como non deue que
muera por ello; Et el que ffuere acusado dela muerte que ffuesse pregonado de nueue
en nueue dias tres uezes & el que non vinjere alos prego nes a conplir de derecho.
alos parientes del muerto dende adelante que ssalga por ffechor; & quel maten por ello
en todos los Regnos do quier quel ffallassen; Et Agora mostraron nos de uuestra parte que
pusiestes postura en uuestro Conçejo por que eran los pregones muy alongados. & sse descubren
las pesquisas & sse ffazien muchos males. & por que sse menguaua la nuestra Justiçia. & otro ssi por
la apremjar mas que pusiestes los pregones de terçer en terçer dia. Et el que non
vinjesse alos nueue dias conplir de derecho alos parientes del muerto que ffuesse
dado por ffechor & quel matassen en todos nuestros Regnos; o quier quel ffallassen. Et que nos
pidiedes merçed que lo toujessemos por bien; Et Nos tenemos lo por bien. Et
mandamos que el que matare omne como non deue que muera por ello. Et el que ffuere
Acusado de muerte & non vjnjere alos pregones delos nueue dias a conplir de
derecho alos parientes del muerto assi como lo uos pusiestes que vaya por ffechor
& quel maten por ello en todos nuestros Regnos o quier quelo ffallaren; Et esto ssera entre
uuestros vezjnos dela villa mas non contra los otros omnes fforannos que an de venjr
y a juyzio; Et por que esto ssea ffirme & estable pora ssienpre. mandamos uos dar
esta carta sseellada con nuestro Seello de Çera colgado. Dada en Palençia. quinze
dias de Enero ERa de mill & trezientos & treynta & dos Annos. yo Pero sanchez la fiz
escreuir por mandado del Rey
diago fferrandez
Descargar XML • Descargar texto
