e-Vinyals | Epistolario dixital de María Vinyals

O epistolario e-Vinyals concíbese como un corpus aberto e colaborativo no cal se ofrece a edición dixital da correspondencia escrita por e dirixida a María de la Asunción Rosalía Josefa Aquilina Zenobia Eusebia Anastasia Vinyals y Ferrés —máis coñecida como María Vinyals, Marquesa de Ayerbe ou María (de) Lluria—, escritora, feminista e activista social sobranceira cuxa actividade social e cultural se sitúa entre finais do século XIX e primeiras décadas do XX. O proxecto nace co obxectivo de localizar, conservar, analizar e difundir un epistolario complexo que documenta a súa rede relacional, intelectual e afectiva, ofrecendo en acceso aberto un repertorio en expansión de ducias de cartas tanto manuscritas como mecanografadas, útiles para a investigación e a divulgación sobre esta figura sobranceira do feminismo e da escrita e compromiso social das mulleres no seu tempo. Do punto de vista lingüístico e arquivístico, o corpus e-Vinyals recolle testemuños redixidos principalmente en castelán (aínda que tamén hai misivas escritas en francés ou inglés) e integra materiais procedentes de diversos arquivos e coleccións —entre outros, o Museo de Pontevedra, a Real Academia de la Historia, o Museo Sorolla, a Residencia de Señoritas (F. Ortega y Gasset–Gregorio Marañón), a Torre do Tombo (Arquivo Burnay) ou algúns arquivos familiares—. Integrado como un subproxecto específico do Escritorio Galego-Portugués Antigo (EGPA), e-Vinyals fomenta a colaboración de todas as persoas interesadas en ampliar, con novas achegas e revisións, un repertorio epistolar o máis completo posible, orientado ao estudo histórico, literario e social da autora e da súa contorna.

Como citar

García-Fernández, Miguel e Silvia Cernadas Martínez (dirs.) (2023-): e-Vinyals. Epistolario dixital de María Vinyals. Santiago de Compostela: Instituto de Estudos Galegos Padre Sarmiento, CSIC-Xunta de Galicia / Instituto da Lingua Galega, Universidade de Santiago de Compostela / Universidad de Alcalá / Universidad Nacional de Educación a Distancia, <https://corpora.uah.es/evinyals/> [data de acceso].

Colaboración académica

O desenvolvemento do corpus e-Vinyals enmárcase na colaboración con varios proxectos de investigación, como "LETRADAS. Corpus de textos escritos por mujeres en España (1400-1900)" (Universidad de Alcalá) e "HERES 3.0. Patrimonio textual panibérico: recuperación y memoria" (UNED / Universidad de Alcalá / Instituto da Lingua Galega, Universidade de Santiago de Compostela / Instituto de Estudos Galegos Padre Sarmiento, CSIC-Xunta de Galicia). 

Abreviaturas de arquivos usadas na táboa de documentos 

• AFFFP = Arquivo familiar de Fernando Ferreira Priegue
• AMUPO = Arquivo do Museo de Pontevedra
• AMUSO = Arquivo do Museo Sorolla (Madrid)
• ANTT = Arquivo Nacional da Torre do Tombo (Lisboa)
• ARS = Arquivo da Residencia de Señoritas (Fundación José Ortega y Gasset-Gregorio Marañón, Madrid)
• RAH = Real Academia da Historia (Madrid)