EGPAdoc-0023
Doazón da raíña dona Violante ás donas e convento de Santa Clara de Allariz
| Data cronológica | Medina de Rioseco |
|---|
| Localidade | 1295/09/24 |
|---|
| Sumário | A raíña Violante outorga ás donas e convento de Santa Clara de Allariz o mosteiro que ela mesma fundou e as compras que fixera para este |
|---|
| Arquivo | Arquivo Histórico Provincial de Ourense |
|---|
| Cota | AHPOu, Clero, carp. 6, nº 25 |
|---|
| Transcritor/a | Miguel García-Fernández |
|---|
| Editor/a 1 | Miguel García-Fernández |
|---|
| Editor/a 2 | Ricardo Pichel |
|---|
| Editor/a digital | Ricardo Pichel |
|---|
Opções de representação
Texto: - Mostrar:
O script do Java parece estar desligado, ou então houve um erro de comunicação. Ligue o script do Java para mais opções de representação.
Sepan quantos esta carta vieren. Como yo Donna yolante por la graçia de dios Reyna de Castiella &
de Leon di & Otorgo Auos las duennas & al Conuento del monesterio de ssancta clara de Allariz Alas que
Agora ssodes e sseredes daqui Adelante por dios & por mj Anjma & por las Anjmas de mjo padre & de mj
madre & del Rey don Alffonso & de mjos ffijos & de todos aquellos por qui yo sso tenuda de ffazer bien.
El monesterio que yo ffiz en la dicha allariz. & Todas las conpras que yo y ffiz & en los otros logares
para este monesterio offiziere daqui Adelante en qual manera quier que ssean ffechas assi tierras como vinnas
& ssuelos & casas & ffornos & Açennas & molinos & montes & huertas & prados & exidos & ffuentes & Agu
as corrientes & non corrientes & Oueyas & vacas & otros ganados quales quier. & Moros & Moras
& donasCon trazo supralinear. de yglesia & otras donas quales quier que uos yo oue dadas o uos dieren daqui adelante
& Todas las otras cosas quales quier que ssean que uos yo di o uos diere assi mueble como rrayz
yo uos las conffirmo & uos las otorgo assi como sse meyor pueden dar entre viuos quelas aya
des libres & quitas para ssienpre jamas para ffazer dellas & enellas assi como de uuestro. Et mando & deffien
do que ffijos njn njetos njn heredero que yo aya njn otro njnguno que ssea que uos non puedan enbar
gar njn demandar njn contrallar estas cosas desta donaçion que uos yo di que sson ssobre dichas ennjn
gun tienpo. Et qual quier que contra ello ffuere aya la yra de dios & la mj maldiçion que nunqua pue
da sseer ssaluo por cosa que diga njn que ffaga. Et desto uos di esta mj carta sseellada con
mjo Seello colgado. ffecha en Medina de Rio sseco veynte & quatro dias de Setienbre. Era de
mill & Trezientos & Treynta & Tres annos. yo, Roy peres publico escriuano en Medina de Rio sseco
ffiz esta carta por mandado dela muy noble Sennora Reyna donna yolante & ffiz enella mjo Sig
no tal en Testimonjo. Testimonjos que ffueron presentes aesto ffrey Johan de Cama. &
ffrey alffonso dominguez. & ffrey domingo martinez & ffrey fferrnando de cama ffrayres dela orden de ssan ffrançisco. & Pero
dominguez fide gonçalo pan & agua. & Johan ffernandez fijo de fferrnan garçia. & martin peres. & per esteuan clerigos de sancta maria
& fortun ssanchez. & Johan guerra. & don anton clerigos de ssancta Cruz de Medina de Rio sseco.
Guardar XML • Descarregar texto
