Carmen Isasi MartínezMaría Jesús Torrens Álvarez Nayra Sánchez VeraGHENCORHENCORHEN-0253Archivo Histórico NacionalClero Secular_Regular, car. 293, n. 18

Lope Ferrández de Escaño vende a Lope García de Urria un solar en Quintanilla de Pienza y parte del monasterio de Santa María de Bárcena

1280 septiembre 4Medina de PomarBurgosEspaña42.927778 -3.486667Juan Martínez Conosçida cosa ssea atodos quantos esta carta uieren como yo lope fferranz descanno otorgo & uengo de conosçido que uendj. auos lope garçia. de urria. por ala abbat de onna el mio ssollar. que yo he en quintaniella. de pienza. el que ffue de pero perez dornes & la parte del Monesterio de ssanta maria de uarzena. Et llas dos partes que yo he enel Sollar de mont mediano que es de partir con diago gomez mio ssobrjno & uendo uos llo con entradas e con ssallidas & con montes. & con ffuentes & con aruoles. & contodas ssos pertenençias assi como amj perteneçer. deuian Et diesestes. me porello. mill. & dozientos & ssessenta. & sseys. morauedis dela moneda blanca dela primera guerra Et destos morauedis. ssobredichos otorgo que So muy bien. pagado atoda mj. voluntat. Et uendo uos llo. con tal paramiento que desta. ssant miguell primera que uiene dela era desta carta en dos. annos. que ssi llope ffernandez. uos diere estos. morauedis. ssobredichos auos. abbat de onna que uos lope Garçia durria. o otro omne qual quier por el abbat de Onna que me uenda. estos ssollares que uos yo uendo Et lla. parte del monesterio ssobredicho Et ssi uos non diero llos mill. & dozientos & ssessenta. &. sseys morauedis. al plazo ssobredicho que ffinquen llos ssollares & lla. parte del monesterio enel monesterio donna quito & libre por ssiempre jamas desto uos dj por ffiador de ffazer yur. anno & dia apero gomez de porres. & ffiador de redrar & de otorgar amj por Sienpre & aotro affuero de castiella douanes dela Riba. Et ffiador de ffazer partir. adiago gomez mio ssobrino el ssollar de mont medjano johan. gonçalez de rrio alcalle de castiella desto son testes conçeios & testes quelo vieron dia Sanchez delordem. & gomez. yuanes. de ssoto palaçios. Et ssancho llopez. de uilla. nueua. & ssancho rroyz. deoualdio & rrodrigaluarez. & Diago llopez. ffijo delope garçia de urria. & pero fferrandez de medjna. clerigo rroy martinez. ffijo de johan perez. de criales & don. esteuano de vila conparat. ffecha miercoles iiij dias de ssetienbre Era de mill. &. ccc & xviij. annos Et yo juhan martinez escriuano publico por el Rey. en Medina de Pumar por Rueguo de lope fferrandez e delos ffiadores. ssobre dichos. mande ffazer esta carta

Et pusi en ella mio ssigno en testimonio de verdat