María Jesús Torrens ÁlvarezJaime González GómezAlexandra DuttenhoferGHENCORHENCORHEN-0147Archivo Histórico NacionalClero Secular_Regular, car. 285, n. 14

Lop López dona al monasterio de San Salvador de Oña una tierra en Arroyuelo (perteneciente hoy a Trespaderne) y dos viñas en Fresnedo

1241 abril 4ArroyueloBurgosEspaña42.835033 -3.383575 Connoscuda cosa sea A todos quantos esta carta uieren como yo Lop lopez de torres de mi buena uoluntad en remission de mios peccados do al monesterio de Onna por mucho bien & mucho beneficio que recebi dent una tierra que he en Arroyuelo que es al uall & dos uinnas a fresnedo. assi lo offresco & lo do que daqui adelant que lo ayan por heredamiento & que fagan dello a su uoluntad pora siempre. Et por que esto fuesse firme rogue a mio sobrino pero perez que lo otorgase. & que fuesse dello fiador el & Garçi lopez de tamayo. Et yo pero perez otorgolo & somos dende fiadores yo & garçi lopez. Amos de mancomun & cadauno por todo de redrar & de sanar a fuero de tierra a todo omne que lo demandar. Fecha la carta en el Era de mill. cc. Lxxviiijª. El dia de sant Ysidro. en el mes de Abril. Et en este dia mismo yo pero perez & Garçi lopez fiadores sobredichos metimos A don Yague sacristano mayor de onna en el heredamiento sobredicho. Desto son testigos que lo uieron & que lo oyeron. De fijos dalgo. Garçi lopez de tamayo. pero lopez de torres. Sancho perez so hermano. Don lop de lordem. Don pero clerigo de trespaderne. Labradores de Arroyuelo. Domingo Yuannes. Don Adam. Don ysaach. Don bartholome. Pedro sanchez. Alfonso. Martin peidret. Rodrigo. Miguel criado del abbat de Onna. Martin fidalgo.