Clara Grande LópezRaquel Sánchez RomoAna Lobo PugaMireia Peris VicentGEDHYTASCODCARCODCAR-0419Archivo Municipal de BurgosSección hist., nº 2912Alfonso X manda a Aparicio Guillem y Simón Raines que entreguen a Bernalt de Centellas veinte mil maravedís.1278 agosto 14SegoviaSegoviaEspaña40.948056 -4.118333Pero Ferrández
on Alffonsso por la gracia de dios Rey de Castiella de
Toledo de Leon de Gallizia de Seuilla de Cordoua de
Murçia de Jahen & del algarue. Auos APariçio guillem
& Auos Simon Raynes Salut & gracia. vos sabedes de
como vos enbie mandar por mj carta que pagassedes luego
a don bernalt de Çentellas. los. veynte. mill. morauedis. asi como
don Çag vos enbio dezir por su carta & por su Nomina
& que gelos diesedes luego ante que a omne del mundo diese
des ende dinero. Et Agora don bernalt de Çentellas dixo
me que gelos non auedes dado. Et so marauillado como sodes
osados delo fazer en no complir lo que yo mando. Onde vos mando
luego vista esta mj carta. quel cumplades estos veynte. mill morauedis
. Et si por auentura el Conçeio non vos diere los morauedis lue
go a quellos que auien a dar al plazo asi como los yo enbie rrogar
por mj carta que vos que los saquedes & los omnes buenos del
Conçeio que fagan rrecabdo dellos que los den a quellos de qui vos
los sacaredes al plazo que los an a dar. Et mando alos alcaldes
& al Merino de Castiella que entreguen delos morauedis que an adar
al Conçeio a a quellos de qui los sacaren al plazo que ellos los ouie
ren a dar. Et otrossi mando al Conçeio de Castiella. que non den
dinero a don Çag el de don manuel nj a otro ninguno. ffata que
a pariçio guillem & Simon Raynes o qual quier dellos que estos morauedis
sacaren a don Bernalt de Çentellas sean entregados. Et non
ffagan ende al Si no a ellos me tornaria por ello. Dada
en Segouia. xiiij. dias de agosto. era de mill. & ccc. & xvj. annos.
yo Pero ferrandez la fiz escreuir por mandado del Rey.
Sancho martinez