Leyre Martín AizpuruRaquel Sánchez RomoAna Lobo PugaNayra Sánchez VeraGEDHYTASCODCARCODCAR-0175Archivo Municipal de Cartagenaref. AMCT A1_C4_N20Alfonso X dispone que los mercaderes cristianos, moros y judíos que quieran comerciar en Murcia y todos sus reinos puedan hacerlo libremente.1257 abril 24MurciaMurciaEspaña37.986111 -1.130278Gómez Domínguez
on Alffonsso por la gracia de dyos Rey de Castiella de Toledo de Leon de Galliçia de Seuilla de Cor
doua de Murcia & de Jahen; A todos los Mercaderos xpistianos et moros & iudios que esta mi carta uieren
Salut & gracia. Mando uos que todos aquellos que uenir quisieredes a Murcia & a mi tierra & a mios Regnos
que uengades saluos & seguros con uuestro auer & con uuestras mercadurias & con todas uuestras cosas. Et defiendo que ningu
no non sea osado de uos fazer fuerça nin tuerto nin mal ninguno. nin de uos tomar uuestra mercaduria si non por sus
dineros o como se abiniere conuusco. a uuestro plazer. Et aquel que dotra guisa uos la tomasse mandar gela ya dar
doblada con la costa et con la mission que fiziesse en demandar lo quel forçassen. Et mando al mio almoxeriff de Mur
cia & a todos los mios almoxeriffes de mi tierra que uos onrren et que non consientan que ninguno uos faga nin
gun tuerto. Et que uos fagan dar doblado todo aquello que uos tomaren por fuerça. Et si end al fiziessen a ellos
me tornaria por ello. Et otrosi mando a todos los omnes de mis tierras & de mios Regnos que uos onrren et que
ninguno non sea osado de uos façer fuerça nin tuerto nin mal ninguno. Nin uos tomen otro diezmo nin otro por
tadgo si non aquello que uos deuen tomar con derecho. ca aquel que dotra guisa lo fiziesse. al cuerpo & aquanto que
ouiesse me tornaria por ello. Dada en Murcia el Rey la mando .xxiiij. dias de Abril. ERa de mill .CC.
Nouaenta Cinco annos. Gomez dominguez la esuio por mandado de don Garci perez Notario del Rey: