EGPAlab

Sepan quantos esta carta vieren como yo, doña Yolante, por la gracia de Dios reina de Castiella e de León, di e otorgo a vós, las dueñas, e al convento del monesterio de Santa Clara de Allariz, a las que agora sodes e seredes d'aquí adelante, por Dios e por mi ánima e por las ánimas de mio padre e de mi madre e del rey don Alfonso e de mios fijos e de todos aquellos por qui yo só tenuda de fazer bien, el monesterio que yo fiz en la dicha Allariz e todas las compras que yo y fiz e en los otros logares para este monesterio o fiziere d'aquí adelante en qual manera quier que sean fechas, así tierras como viñas e suelos e casas e fornos e aceñas e molinos e montes e huertas e prados e exidos e fuentes e aguas corrientes e non corrientes e oveyas e vacas e otros ganados qualesquier, e moros e moras e donas[1] de iglesia e otras donas qualesquier que vos yo ove dadas o vos dieren d'aquí adelante; e todas las otras cosas qualesquier que sean que vos yo di o vos diere, así mueble como raíz, yo vos las confirmo e vos las otorgo así como se meyor pueden dar entre vivos, que las ayades libres e quitas para siempre jamás para fazer d'ellas e en ellas así como de vuestro. Et mando e defiendo que fijos nin nietos nin heredero que yo aya nin otro ninguno que sea que vos non puedan embargar nin demandar nin contrallar estas cosas d'esta donación que vos yo di, que son sobredichas, en ningún tiempo. Et qualquier que contra ello fuere aya la ira de Dios e la mi maldición, que nunca pueda seer salvo por cosa que diga nin que faga. Et d'esto vos di esta mi carta seellada con mio seello colgado. Fecha en Medina de Río Seco, veinte e quatro días de setiembre, era de mil e trezientos e treínta e tres años. Yo, Roy Peres, público escrivano en Medina de Río Seco, fiz esta carta por mandado de la muy noble señora reina doña Yolante e fiz en ella mio signo

tal en testimonio. Testimonios que fueron presentes a esto: frey Joán de Cama e frey Alfonso Domínguez e frey Domingo Martínez e frey Fernando de Cama, fraires de la orden de San Francisco; e Pero Domínguez Fide Gonçalo Pan e agua e Joán Fernández, fijo de Fernán García, e Martín Peres e Per Estevan, clérigos de Santa María; e Fortún Sánchez e Joán Guerra e don Antón, clérigos de Santa Cruz de Medina de Río Seco.

EGPAdoc-0023

Doazón da raíña dona Violante ás donas e convento de Santa Clara de Allariz

Ver opcións